حكم البيادة

خلصنا من حكم البوليس
ولبسنا حكم البيادة
والثورة راحت فطيس
ماهي في التاريخ عادة

وخلصت ياخال القضية
وناس في الميادين تموت
وناس هناك غبية
وثورة ورا ثورة تفوت
وعشقك يابلدي غيّة

ارفعوا اﻻقلام
واكتب ياتاريخ واقول
عن مجلس وعصابة ونظام
وشعب لسه بيدور
على نبي ورسول

فتّح الورق المكتوب
ياشعب معلّم
شوف مرّه المحجوب
مرّة من التاريخ اتعلم

نسيت لما كنت واقف
في الميدان
نسيت لما قولت ﻻء
في وش السجّان


نسيت دم الشهيد
يوم مامات
نسيت صرخة جيفارا ياعبيد
وﻻ ريما رجت بعادتها
فينا تِبات


الكل بينسي تحت العذاب
تحت الخوف الي ماليها
تحت بوس البيادة والقباب
هي عادتنا وﻻ هنشتريها
دا الذل باب مفتوح جوه باب

والذل بينخر زي دود اﻻرض
لسّاه سارح وماشي
عامل زي السنة والفرض
لسّانة في الزريبة مواشي


ياثورة مين يشتريكي
من قبلك باعوا البلد
وقتلوا في الميدان شقيقي
وخانوا تاني الولد
يعني هي جت عليكي

باعوكي برخص التراب
كل شارع كل حارة كل باب
ماسبوش حاجة فيكي
نهبوكي الكلاب


بعتب عليكي وانا الي صانك
وانا الحارة والشارع
انا النقش الي على جدرانك
وانا الكنيسة والجامع
دا انا الي نصفتك
يوم ما التاريخ خانك


عطشان يابلدي
ومين يسقيني غيرك
دا انا اللي زرعتك
واتمرمط في طينك
وانا اللي شيلتك
يوم ماتهد حيلك

 منتيش مكان يابلد
انتي صانيعي وفلاح
ع اﻻرض اتولد
وسجّان وسفاح
قتلوا فيكي الولد

 عيل م العيال
وش م الوشوش
فارس خيّال
زعيم من غير جيوش
فواعلي وشغّال
وطبقة م الجحوش

وفي الختام. رسالة
م الريف والبندر
م العمال والطبقة الشغالة
يسقط يسقط حكم العسكر
فعل مش بس قوالة



وانتم ياعالم عايشة
في القصور
وانت ياشاويش
ياعبد المأمور
وانت يالي قافل الشيش
وعايش في القبور
 العجلة خلاص دارت
وجاي عليكم الدور