الثورة(ياوﻻد الوسخة)

في البدء كانت كُفر
وخروج ع الحاكم
في النص كانت عُهر
وشغل عوالم
واخرة المُر
سجن على نيابة
على محاكم

والثورة بتتباع وبتتخم
ولسه بيهتفوله
بالروح وبالدم
ولسه بيندهوله
انت الخال وانت العم
ارحمونا ياخلق
كفايانا هم

راح رئيس وجالنا بيادة
وقلنا ياخلق بقى ننضف
اترينا رجعنا لنفس العادة
ليه....طب بس نعرف
قالولنا كفاياكوا بزيادة

والثوره قاعده تشحت
في الخلق والناس
والمجلس في السجن يبعت
ماهو ﻻزم ياخلق ننداس

قولنا نِضرِب
وملعون ابو البيه
وتبقى مندس مُخرب
وكل ده عشان سُبعمية جنية
عريان وجعان .... يرد
طب تاكل ليه
العيب علينا مش عليهم
واللي رضع تلاتين سنة
هيكون يعني ايه

الثوره مش سياسية
وﻻبتتدرس في كتب
وﻻ شغل كياسة
الثورة يعني غضب
الناس اللي تحت الذل
منداسة

بقالنا ثلاتين سنة بنتكلم
خدنا ايه يعني م الكلام
مرّه واحده نتعلم
احنا اسقطنا ياخلق نظام
ليه واقف ومبلم
يعني هي ع العسكر
حرام

كلوها في البطون
لسّة مش واخد بالك
دول رموا الخلق في السجون
لسّاك خايف على عيالك
بكرة تكون انت الملعون
وتلاقيهم مترصدينلك
ورا بابك

بتبكي ليه ياجحا
ارضك واتباعت للغربان
عرضك واتهتك في السجون
بقالو زمان
اصرخ ياجحا
وفكك م اﻻوهام والظنون
قبل مايشنقوك ع الصلبان

إفطنها ياجحا مرّة
واركب الحمار
متكونش مركوب
مش كل مرّة تسلم الجرّة
واتعلم م التاريخ
دا عرابي مات في عيون الخلق
مصلوب


سيبك انت م الكلامنجية
بتوع الشاشات
دول هما الحرامية
دول شوية جبانات
خليك مع الطلعة الثورية
قبل ماحلمك يتسرق
ونقول علية مات

هنخلص امته م العطف والمن
هنبطل امته الكلام
وشغل الزن
الثوره ياوﻻد الوسخة
مهياش سياسية
وﻻعمرها كانت فن


الثورة ياخلق الله منارة
مش بس تعب وهم
الثورة تاريخ وحضارة
بيتكتبو بالدم